Conceyu Abiertu pola Oficialidá
El Conceyu Abiertu pola Oficialidá (CAO) ye una plataforma cívica que tien como únicu oxetivu algamar la oficialidá de la llingua asturiana y del gallego-asturianu nel Estatutu d’Autonomía d’Asturies.
Les llingües d’Asturies son el nuestru patrimoniu, la nuestra ayalga hestórica, la nuestra riqueza cultural, y queremos que sigan vives. Como ciudadanos y ciudadanes queremos que se puedan falar tolos díes con naturalidá y con arguyu. Porque depués de trenta años de reivindicar los nuestros derechos y de pidir una oportunidá pa vivir con normalidá, fáltanos esa marcación llegal que nos dea les garantíes que tienen les llingües reconocíes estatutariamente.
El CAO tien entamao munches actividaes pa reclamar la oficialidá: manifestaciones, esposiciones, marches a pie y en bici, caravanes per tolos conceyos d’Asturies… siempre pidiendo convivencia, respetu, derechos, igualdá pa tol mundu fale na llingua que fale. El CAO concéntrase ente la Xunta Xeneral tolos díes que s’aconceyen los representantes políticos que tán discutiendo la ponencia estatutaria de reforma. Failo pa recordar que n’Asturies hai un asuntu pendiente en cuantes a derechos democráticos y que l’Estatutu d’Autonomía tien que lu resolver reconociendo la oficialidá.
En definitiva, el CAO ta formáu por miles de persones que dan la cara pola oficialidá. ¿Va faltar la tuya?
Gallego-Asturiano
El Conceyo Aberto pola Oficialidá (CAO) é úa plataforma cívica que ten como único obxetivo conseguir a oficialidá da llingua asturiana y del gallego-asturiano nel Estatuto d’Autonomía d’Asturias.
As llinguas d’Asturias son el noso patrimonio, el noso tesouro hestórico, a nosa riqueza cultural, y queremos que sigan vivas. Como ciudadanos y ciudadanas queremos que se podan falar todos os días con naturalidá y con arguyo. Porque despóis de trenta anos de reivindicar os nosos deretos y de pedir úa oportunidá pra vivir con normalidá, fáltanos esa marcación llegal que nos día as garantías que tein as llinguas reconocidas estatutariamente.
El CAO ten amañao muitas actividades pra reclamar a oficialidá: manifestacióis, esposicióis, marchas a pé y en bici, caravanas por todos os conceyos d’Asturias… sempre pedindo convivencia, respeto, deretos, igualdá pra todo el mundo fale na llingua que fale. El CAO concéntrase delantre da Xunta Xeneral todos os días que s’axuntan os representantes políticos que tán discutindo a ponencia estatutaria de reforma. Failo pra recordar qu’en Asturias hai un asunto pendente en conto a deretos democráticos y qu’el Estatuto d’Autonomía ten qu’amañallo reconocendo a oficialidá.
En definitiva, el CAO ta formao por miles de personas que dan a cara pola oficialidá. ¿Vai faltar a túa?
